29 oktyabr - Dünya İnsultla Mübarizə Günü

29 oktyabr – Ümumdünya İnsultla Mübarizə Günü kimi qeyd olunur. Bu günün əsas məqsədi ictimaiyyətdə insultun (beyin qan dövranının pozulması) təhlükələri, onun qarşısının alınması yolları və erkən tibbi müdaxilənin həyati əhəmiyyəti barədə maarifləndirməni artırmaqdır.

 İnsult dünyada ölüm və əlilliyin əsas səbəblərindən biridir. Bu xəstəlik beyin damarlarında qan dövranının kəskin pozulması nəticəsində yaranır və beyinin müəyyən hissəsinin zədələnməsi ilə nəticələnir. Mütəxəssislərin sözlərinə görə, insultun iki əsas forması mövcuddur — işemik insult (damarın tutulması nəticəsində beyin toxumasına qan axınının dayanması) və hemorragik insult (beyin damarının partlaması və qanaxma).

Həkimlər xəbərdarlıq edirlər ki, insultun ilkin əlamətlərini vaxtında tanımaq və dərhal tibbi yardım çağırmaq insan həyatını xilas edə bilər. Üz əzələlərinin asimmetriyası, danışıqda çətinlik, əl və ayaqda qəfil keyimə və zəiflik kimi simptomlar xüsusilə diqqət tələb edir.

Ümumdünya İnsultla Mübarizə Günü 2006-cı ildə Dünya İnsult Təşkilatı (World Stroke Organization) tərəfindən təsis edilib və hər il bu tarixdə müxtəlif ölkələrdə maarifləndirici aksiyalar, tibbi müayinələr və təbliğat kampaniyaları keçirilir.

Sağlam qidalanma, müntəzəm fiziki aktivlik, qan təzyiqinə və şəkər səviyyəsinə nəzarət, siqaretdən və alkoqoldan uzaq durmaq insultun qarşısının alınmasında mühüm rol oynayır.